ฮ่ำบอกไฟขึ้น
จากป้ออุ้ยศรีก๋อง
อิคิกลุยหัง สัททังค้ำฟ้า เสียงสนั่นกล้า ต๊องฟ้าปายบน
เป๋นโกลาหล ปายบนโต้งห้อง เหมือนเสียงฟ้าฮ้อง แผดก้องกังวาน
พ่องหอบลูกหลาน เป๋นปุ๊กเป๋นคู้ ไปกั๋นลู้ลู้ ไปผ่อบอกไฟ
หูดับตับไหล ผ่อบอกไฟขึ้น เป๋นดีใจ๋จื้น ท่าน้าวมีงาน
วาระกิ๋นตาน หลองวัดแก้วเจ้า ตกแต่งแป๋งเก๊า ต่อศาสนา
ผ่อฝูงประชา ศรัทธาแก้วกว้าง บ่ได้ละว่าง ขว้างหื้อหายไป
ตกน้ำบ่ไหล บ่ไฟบ่ไหม้ บุญตานขานไค้ ไผยะไผทำ
เป๋นบุญต๋ามหลัง ไปยังจ๊าดหน้า จ๊าดนี้บ่ต้า มาฮ่วมกิ๋นตาน
ได้มาฮ่วมก๋าน มางานตี้นี้ ขอไขกล่าวจี้ ปี้น้องอาวอา
ยังญาติก๋า วงศาถ้วนหน้า มาเน้อน้องหล้า มาผ่อบอกไฟ
ผู้คนหลวงหลาย หลั่งไหลมาจ้อม แห่แหนแวดล้อม ป้าดก๊องก๋องยาว
ตึงหนุ่มตึงสาว ไค่หัวเหิดสู้ คึกคักแต้ลู้ ยอดจู้คนงาม
จ๊าดขี้ปู๋มหลาม อกแง้นแป้แล้ ผ่อดูถี่แต้ เป๋นต๋าดีจัง
มานุ่งซิ่นปั๋ง เสือกไค่ก๋ำจอง มานุ่งซิ่นย้อม น้ำแหล้ลงคราม
คนเฒ่าบ่งาม นั่งหดอยู่ใต้ ฮ่มปื้นเก๊าไม้ ต๋ามเหมืองคันนา
ผ่อเทิ้มนั่นกา จุ๋มปลวกว่าอั้น เป๋นหลืบเป๋นจั้น หลั่งไหลกั๋นมา
หนุ่มสาวนั่นกา ม่วนงันแต้ใบ้ หากปิ๊กไปได้ ไค่ลดลงซาว
ไปเป๋นหนุ่มสาว ฟ้อนรำต๋ำเต้น บ่มีหลบเว้น ตึงม่วนตึงงัน
เจิญมาผ่อกั๋น ผ่อบอกไฟขึ้น หื้อมันใจ๋จื้น สนุกเจยบาน
ยั้งเวียกยั้งก๋าน จ๋านชามแลถ้วย บ้านเฮือนแหมด้วย วันพูกค่อยทำ
ความม่วนมาต๋ำ ละไว้ก่อนเจ้า วันพูกเมื่อเจ๊า ค่อยล้างค่อยโท
งานใหญ่งานโต๋ มาเน้อน้องหล้า คนเฒ่าย่างจ้า ขอลาลวดลง
ขอจบวางป๋ง ลงไว้เต้าอี้ ก่อนแลนายเหย .....
